സ്മൃതി ഇറാനിയുടെ സഹായിയുടെ കൊലപാതകം; കേസില്‍ ഏഴ് പേര്‍ അറസ്റ്റില്‍
അമേഠി: സ്മൃതി ഇറാനിയുടെ അമേഠിയിലെ സഹായി വെടിയേറ്റ് മരിച്ച സംഭവത്തില്‍ വഴിത്തിരിവ്. ബരോളിയ ഗ്രാമത്തിലെ മുന്‍ ഗ്രാമ തലവന്‍ കൂടിയായ സുരേന്ദ്ര സിംഗിന് നേരെ വെടിയുതിര്‍ത്ത കേസില്‍ അഞ്ച് പേര്‍കൂടി അറസ്റ്റിലായി. വാസിം, നാസിം, ഗോലു, രാമചന്ദ്ര, ധര്‍മനാഥ ഗുപ്ത എന്നിവരെയാണ് പൊലീസ് അറസ്റ്റ് ചെയ്തത്. ഇതോടെ കേസില്‍ അറസ്റ്റിലായവരുടെ എണ്ണം ഏഴ് ആയി. സുരേന്ദ്ര സിംഗിന്റെ സഹോദരന്‍ നരേന്ദ്ര സിംഗിന്റെ പരാതിയിന്‍മേലാണ് പൊലീസ് നടപടി. അമേഠിയിലെ ജാമോ പൊലീസ് സ്റ്റേഷനിലാണ് നരേന്ദ്ര സിംഗ് പരാതി നല്‍കിയത്.
സംഭവം നടന്ന ദിവസം (മെയ് 25 ശനിയാഴ്ച) രാത്രി 11.30-ഓടെ ബൈക്കിലെത്തിയ അക്രമികള്‍ വീടിന് മുന്നിലെ വരാന്തയില്‍ ഉറങ്ങുകയായിരുന്ന സുരേന്ദ്ര സിംഗിന് നേരെ നിറയൊഴിക്കുകയായിരുന്നു. മരുമക്കളായ അഭയ്, അനുരാഗ് എന്നിവര്‍ക്കൊപ്പമാണ് സുരേന്ദ്ര സിംഗിന് കിടന്നിരുന്നത്. വെടിയുതിര്‍ക്കുന്നതിന്റെ ശബ്ദം കേട്ട് ഉമ്മറത്തെത്തിയപ്പോഴാണ് തലയ്ക്ക് വെടിയേറ്റ് രക്തത്തില്‍ കുളിച്ച്‌ കിടക്കുന്ന സഹോദരനെ കാണുന്നത്. വെടിവച്ച സമയത്ത് വീടിന്റെ ഉമ്മറത്ത് കൂടി വാസിം, നാസിം, ഗോലു, രാമചന്ദ്ര എന്നിവര്‍ ഓടിപോകുന്നത് കണ്ടതായും നരേന്ദ്ര സിംഗ് നല്‍കിയ പരാതിയില്‍ ആരോപിച്ചു.
പഞ്ചായത്ത് തെരഞ്ഞെടുപ്പ് സമയത്ത് ധര്‍മനാഥ ഗുപ്ത എന്നയാളുമായി സുരേന്ദ്ര സിംഗ് തര്‍ക്കത്തിലായിരുന്നു. ലോക്സഭ തെരഞ്ഞെടുപ്പില്‍ രാമചന്ദ്രയും തങ്ങളുടെ അടുത്തബന്ധുവും തമ്മില്‍ തര്‍ക്കമുണ്ടായിരുന്നതായും നരേന്ദ്ര സിംഗ് പറഞ്ഞു. ഐപിസി 302 (കൊലപാതകം), 120 ബി (ക്രിമിനല്‍ ഗൂഢാലോചന) എന്നീ വകുപ്പുകള്‍ പ്രകാരമാണ് പ്രതികള്‍ക്കെതിരെ കേസെടുത്തതെന്ന് ജാമോ പൊലീസ് സ്റ്റേഷന്‍ എസ്‌എച്ച്‌ഒ രാജീവ് സിംഗ് പറഞ്ഞു.
അതേസമയം, രാഷ്ട്രീയ വൈരാഗ്യമോ പഴയ തര്‍ക്കമോ ആയിരിക്കാം കൊലപാതകത്തിന് പിന്നില്ലെന്നാണ് പൊലീസിന്റെ പ്രാഥമിക നിഗമനം. സംഭവം നടന്ന സ്ഥലത്തുനിന്ന് കണ്ടെടുത്ത സിസിടിവി ദൃശ്യങ്ങള്‍ പരിശോധിച്ച്‌ വരുകയാണ്. അന്വേഷണം പുരോഗമിക്കുകയാണെന്നും അടുത്ത 12 മണിക്കൂറിനുള്ളില്‍ പ്രതികളെ പിടികൂടുമെന്നാണ് പ്രതീക്ഷിക്കുന്നതായും ഡിജിപി ഓം പ്രകാശം സിംഗ് വ്യക്തമാക്കി. കേസില്‍ ഉടന്‍ നടപടി എടുത്ത് റിപ്പോര്‍ട്ട് സമര്‍പ്പിക്കണമെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് നിര്‍ദ്ദേശം നല്‍കിയതായും ഡിജിപി പറഞ്ഞു.2014-ലെ തെരഞ്ഞെടുപ്പ് മുതല്‍ സ്മൃതിക്കൊപ്പം പ്രവര്‍ത്തിക്കുന്നയാളാണ് സുരേന്ദ്ര. ലോക്സഭ തെരഞ്ഞെടുപ്പില്‍ വമ്ബിച്ച വിജയം നേടിയ സ്മൃതി ഇറാനിയുടെ അടുത്ത അനുനായി വെടിയേറ്റ് മരിച്ചെന്ന വാര്‍ത്തയുടെ ഞെട്ടലിലാണ് അമേഠി ജനത.
