വിവാഹേതര ലൈംഗികബന്ധം ക്രിമിനല്‍ കുറ്റമല്ല- സുപ്രീം കോടതി
ഡല്‍ഹി: വിവാഹേതര ലൈംഗിക ബന്ധം ക്രിമിനല്‍ കുറ്റമായി കണക്കാക്കുന്ന ഐപിസി 497-ാം വകുപ്പ് സുപ്രീംകോടതി റദ്ദാക്കി. ചീഫ് ജസ്റ്റീസ് അധ്യക്ഷനായ അഞ്ചംഗ ഭരണഘടനാ ബഞ്ചാണ് 160 വര്‍ഷം പഴക്കമുള്ള നിയമം ഇല്ലാതാക്കിയത്. വിവാഹേതര ബന്ധം കുറ്റകരമാക്കുന്ന 497-ാം വകുപ്പ് ഭരണഘടനാ വിരുദ്ധമാണെന്ന സുപ്രധാന നിരീക്ഷണമാണ് സുപ്രീംകോടതി നടത്തിയത്. മലയാളിയായ ജോസഫ് ഷൈന്‍ നല്‍കിയ ഹര്‍ജിയിലാണ് ഭരണഘടനാ ബെഞ്ചിന്റെ വിധി.
സ്ത്രീകളുടെ ജീവിക്കാനുള്ള അവകാശത്തെ ഹനിക്കുന്നതാണ് 497-ാം വകുപ്പിലെ വ്യവസ്ഥകള്‍.ഈ വകുപ്പ് വിവേചനപരവും കാലഹരണപ്പെട്ടതുമാണ്. ഭര്‍ത്താക്കന്മാര്‍ സ്ത്രീകളുടെ യജമാന്മാരല്ലെന്നും ഭാര്യയുടെ ഉടമയല്ല ഭര്‍ത്താവെന്നും ഭരണഘടനാ ബെഞ്ച് ഉത്തരവിട്ടു. തുല്യത ഭരണഘടന ഉറപ്പു നല്‍കുന്ന മൗലികാവകാശങ്ങളില്‍ ഒന്നാണ്. 497-ാം വകുപ്പ് വ്യക്തി സ്വാതന്ത്ര്യത്തിന്മേലുള്ള കടന്നുകയറ്റമായി മാത്രമേ കണക്കാക്കാന്‍ സാധിക്കൂ.
