യൂണി. കോളേജ് സംഘര്‍ഷം; പ്രതികളായ ആറുപേരെയും സസ‌്പെന്‍ഡ‌് ചെയ‌്തതായി എസ്എഫ്ഐ
തിരുവനന്തപുരം: യൂണിവേഴ്‌സിറ്റി കോളേജില്‍ വിദ്യാര്‍ഥികള്‍ തമ്മിലുണ്ടായ സംഘര്‍ഷത്തില്‍ ഒരാള്‍ക്ക് കുത്തേറ്റു. പരിക്കേറ്റ മൂന്നാംവര്‍ഷ ബിരുദ വിദ്യാര്‍ഥി അഖിലിനെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ആന്തരിക രക്തസ്രാവം കണ്ടെത്തിയതിനെ തുടര്‍ന്ന‌് ശസ‌്ത്രക്രിയ നടത്തി. ആരോഗ്യനില തൃപ‌്തികരമാണെന്ന‌് ഡോക്ടര്‍മാര്‍ അറിയിച്ചു. പരിക്കേറ്റ മറ്റ‌് രണ്ട‌് വിദ്യാര്‍ഥികളും മെഡിക്കല്‍ കോളേജ് ആശുപത്രിയില്‍ ചികിത്സയിലാണ‌്. ആറ‌് പേര്‍ക്കെതിരെ വധശ്രമത്തിനും സംഘംചേര്‍ന്ന‌് മര്‍ദിച്ചതിനും പൊലീസ‌് കേസെടുത്തു. ഏതാനും ദിവസം മുമ്ബ‌് ക്യാന്റീനില്‍ പാട്ടുപാടിയതുമായി ബന്ധപ്പെട്ട‌് ഇരുവിഭാഗം ഏറ്റുമുട്ടിയിരുന്നു.
വെള്ളിയാഴ‌്ച രാവിലെ വീണ്ടും വാക്കേറ്റവും ഉന്തുംതള്ളുമുണ്ടായി. അധ്യാപകരും മറ്റ‌് വിദ്യാര്‍ഥികളും ഇടപെട്ട‌് ഇരുകൂട്ടരെയും പിന്തിരിപ്പിച്ചെങ്കിലും ഒരു സംഘം വിദ്യാര്‍ഥികള്‍ അഖിലിനെ മര്‍ദിച്ചു. ഇതിനിടെയാണ‌് കുത്തേറ്റത‌്. രോഷാകുലരായ വിദ്യാര്‍ഥികള്‍ അക്രമികളെ അറസ‌്റ്റ‌് ചെയ്യണമെന്നാവശ്യപ്പെട്ട‌് കോളേജി‌ന‌് മുന്നിലെ റോഡില്‍ കുത്തിയിരുന്ന‌ു. എസ്എഫ്ഐ യൂണിറ്റ‌് കമ്മിറ്റിയിലുള്ള ചിലരാണ‌് അക്രമത്തിന‌് പിന്നിലെന്ന‌ും അക്രമികള്‍ക്കെതിരെ നടപടി വേണമെന്നും വിദ്യാര്‍ഥികള്‍ ആവശ്യപ്പെട്ടു.
സംഭവത്തില്‍ കോളേജ് വിദ്യാഭ്യാസ ഡയറക്ടറോട‌് സര്‍ക്കാര്‍ റിപ്പോര്‍ട്ട‌് തേടി. പ്രതികളായ ആറുപേരെയും സസ‌്പെന്‍ഡ‌് ചെയ‌്തതായി എസ്എഫ്ഐ ജില്ലാകമ്മിറ്റിഅറിയിച്ചു.
