ഭരണഭാഷാ വാരാഘോഷത്തിന് തുടക്കമായി
കോഴിക്കോട്: ഭരണഭാഷാ വാരാഘോഷത്തിന് തുടക്കമായി. മലയാള ദിനാഘോഷത്തിൻ്റെയും ഭരണഭാഷാ വാരാചരണത്തിൻ്റെയും ഉദ്ഘാടനം കളക്ടര്‍ എന്‍. തേജ് ലോഹിത് റെഡ്ഡി നിര്‍വഹിച്ചു. ജില്ലാ ഭരണകൂടത്തിൻ്റെയും ജില്ലാ ഇന്‍ഫര്‍മേഷന്‍ ഓഫീസിൻ്റെയും ആഭിമുഖ്യത്തില്‍ കളക്ടറേറ്റ് കോണ്‍ഫറന്‍സ് ഹാളില്‍ നടന്ന ചടങ്ങില്‍ സാഹിത്യകാരനും കേരള സാഹിത്യ അക്കാദമി അവാര്‍ഡ് ജേതാവുമായ വി.ആര്‍ സുധീഷ് മുഖ്യ പ്രഭാഷണം നടത്തി.
ഭാഷ തന്നെയാണ് സംസ്‌കാരമെന്നും അക്കാര്യത്തില്‍ വിട്ടുവീഴ്ച പാടില്ലെന്നും അദ്ദേഹം പറഞ്ഞു. പഠനരംഗത്തായാലും സാഹിത്യമേഖലയിലാണെങ്കിലും ഔദ്യോഗിക ജീവിതത്തിലാണെങ്കിലും മാതൃഭാഷയോട് പൂര്‍ണമായും കൂറു പുലര്‍ത്തണമെന്നും അദ്ദേഹം കൂട്ടിച്ചേര്‍ത്തു. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പ് കോഴിക്കോട് മേഖലാ ഡെപ്യൂട്ടി ഡയറക്ടര്‍ സി.അയ്യപ്പന്‍ അദ്ധ്യക്ഷത വഹിച്ചു.
അഡീഷണല്‍ ജില്ലാ മജിസ്‌ട്രേറ്റ് സി.മുഹമ്മദ് റഫീഖ്, ജില്ലാ സാമൂഹ്യനീതി ഓഫീസര്‍ അഷ്‌റഫ് കാവില്‍, ജില്ലാ ഇന്‍ഫര്‍മേഷന്‍ ഓഫീസര്‍ കെ.ദീപ, അസി. ഇന്‍ഫര്‍മേഷന്‍ ഓഫീസര്‍ കെ.എസ്.സൗമ്യ തുടങ്ങിയവര്‍ സംസാരിച്ചു. ഡെപ്യൂട്ടി കളക്ടര്‍മാരായ അന്‍വര്‍ സാദത്ത്, ഷാമിന്‍ സെബാസ്റ്റ്യന്‍, കെ.ഹിമ, കളക്ടറേറ്റിലെ വിവിധ വകുപ്പ് ഉദ്യാഗസ്ഥര്‍ തുടങ്ങിയവര്‍ പങ്കെടുത്തു. വാരാചരണത്തിന്റെ ഭാഗമായി ജീവനക്കാര്‍ ഭരണഭാഷാ പ്രതിജ്ഞയെടുത്തു. ജില്ലാ ഇന്‍ഫര്‍മേഷന്‍ ഓഫീസിന്റെ ആഭിമുഖ്യത്തില്‍ സര്‍ക്കാര്‍ ജീവനക്കാര്‍ക്കും കോളേജ് വിദ്യാര്‍ത്ഥികള്‍ക്കും സാഹിത്യ രചനാ മത്സരങ്ങള്‍ നടത്തും.
