തോരായിക്കടവ് ഉപ്പ് വെള്ള പ്രതിരോധ തടയിണ നിർമ്മിക്കാൻ 30 ലക്ഷം രൂപ അനുവദിച്ചു
ചേമഞ്ചേരി: തോരായിക്കടവിന് സമീപം തോട്ടിലൂടെ പുഴയിൽ നിന്നും ഉപ്പുവെള്ളം കയറി കിണർ വെള്ളം മലിനമാകുന്നതിന് ശാശ്വത പരിഹാരമായി. കല്ലുംപുറത്ത് ഉപ്പുവെള്ള പ്രതിരോധ തടയിണ നിർമ്മിക്കാൻ മൈനർ ഇറിഗേഷൻ വകുപ്പിൽ നിന്നും 30 ലക്ഷം രൂപ അനുവദിച്ചതായി കാനത്തിൽ ജമീല എം.എൽ.എ അറിയിച്ചു.
ചേമഞ്ചേരി ഗ്രാമപഞ്ചായത്തിലെ നാലാം വാർഡിലാണ് തടയിണ വരുന്നത്. തോടിന് ഇരുവശവും 60 മീറ്ററോളം നീളത്തിൽ സംരക്ഷണ ഭിത്തിയും പദ്ധതിയിലുൾപ്പെടുത്തി നിർമ്മിക്കുന്നുണ്ട്. പ്രവൃത്തി പൂർത്തിയാകുന്നതോടെ ഏകദേശം 10 ഹെക്ടറോളം ഏരിയയിൽ ഉപ്പുവെള്ളം കയറുന്നത് തടയുകയും നിരവധി കുടുംബങ്ങളുടെ കുടിവെള്ള സ്രോതസ്സ് സംരക്ഷിക്കപ്പെടുകയും ചെയ്യും.
