കുട്ടനാട്ടില്‍ മട വീണ് കൃഷി നശിച്ചവര്‍ക്ക് ഇന്‍ഷൂറന്‍സില്ലെങ്കിലും നഷ്ടപരിഹാരം ഉറപ്പാക്കുമെന്ന് തോമസ് ഐസക്ക്
ആലപ്പുഴ: കുട്ടനാട്ടില്‍ മട വീണ് കൃഷി നശിച്ചവര്‍ക്ക് ഇന്‍ഷൂറന്‍സില്ലെങ്കിലും നഷ്ടപരിഹാരം ഉറപ്പാക്കുമെന്ന് മന്ത്രി തോമസ് ഐസക്. വെള്ളമിറങ്ങിയ പ്രദേശങ്ങളില്‍ ശുചീകരണം നടത്താന്‍ തദ്ദേശസ്വയംഭരണ സ്ഥാപനങ്ങള്‍ക്ക് പണം ചെലവഴിക്കാന്‍ പഞ്ചായത്തുകള്‍ മുന്‍കൂര്‍ അനുമതി ഓണ്‍ ഫണ്ടില്‍ നിന്ന് മൂന്ന് ലക്ഷം രൂപ വരെ വിനിയോഗിക്കാന്‍ അനുമതി നല്‍കിയിട്ടുണ്ടെന്നും തോമസ് ഐസക് ആലപ്പുഴയില്‍ പറഞ്ഞു.
ജില്ലയിലെ പ്രളയബാധിത പ്രദേശങ്ങളില്‍ വെള്ളം ഇറങ്ങുന്ന മുറയ്ക്ക് വൃത്തിയാക്കല്‍ പ്രവര്‍ത്തനങ്ങള്‍ ത്വരിതഗതിയില്‍ നടത്തണമെന്നും ഇതിനായി തദ്ദേശ സ്വയംഭരണ സ്ഥാപനങ്ങള്‍ക്ക് മൂന്നു ലക്ഷം രൂപ വരെ തനത് ഫണ്ടില്‍ നിന്നോ പ്ലാന്‍ ഫണ്ടില്‍ നിന്നോ മുന്‍കൂര്‍ അനുമതിയില്ലാതെ ചെലവഴിക്കാമെന്നും മന്ത്രി തോമസ് ഐസക് അറിയിച്ചു. പകര്‍ച്ച വ്യാധി ഭീഷണി നില നില്‍ക്കുന്ന സമയമാണിത്. ഏതെങ്കിലും പഞ്ചായത്തിന് കൂടുതല്‍ തുക ആവശ്യമുണ്ടെങ്കില്‍ അത് ചെലവഴിക്കാന്‍ അനുവാദം നല്‍കും. കൃഷി നശിച്ച കര്‍ഷകരില്‍ ഇന്‍ഷൂറന്‍സെടുക്കാത്തവര്‍ക്കും സര്‍ക്കാര്‍ നഷ്ടപരിഹാരം നല്‍കും.
മട വീഴ്ചയുണ്ടായ പാടശേഖരങ്ങളില്‍ അത് പരിഹരിക്കുന്നതിലുള്ള കാല താമസം ഒഴിവാക്കാന്‍ ടെണ്ടര്‍ വിളിക്കാതെ പാടശേഖര സമിതികളെക്കൊണ്ട് നേരിട്ട് പണി ചെയ്യിക്കുമെന്നും മന്ത്രി പറഞ്ഞു. കുടിവെള്ള ക്ഷാമം പരിഹരിക്കുന്നതിനായി 241 കോടിയുടെ കുട്ടനാട് കുടിവെള്ള പദ്ധതി നടപ്പാക്കുമെന്നും പദ്ധതിക്ക് വാട്ടര്‍ അതോറിറ്റി അനുമതി നല്‍കിയതായും തോമസ് ഐസക് പറഞ്ഞു. കുട്ടനാട്ടിലെ പ്രളയബാധിത പ്രദേശങ്ങള്‍ സന്ദര്‍ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
