ഐ.എസ്‌; സംസ്ഥാനത്ത് മുസ്ലീം വിരുദ്ധ വികാരം ഉണ്ടാക്കാന്‍ ശ്രമം നടക്കുന്നതായി മുഖ്യമന്ത്രി പിണറായി വിജയന്‍
തിരുവനന്തപുരം: കേരളത്തില്‍ നിന്ന് ദുരൂഹമായ സാഹചര്യത്തില്‍ കാണാതായവരില്‍ ചിലര്‍ ഐ.എസില്‍ ചേര്‍ന്നുവെന്ന സൂചനകളുടെ മറവില്‍ സംസ്ഥാനത്ത് മുസ്ലീം വിരുദ്ധ വികാരം ഉണ്ടാക്കാന്‍ ശ്രമം നടക്കുന്നതായി മുഖ്യമന്ത്രി പിണറായി വിജയന്‍. നിയമസഭയില്‍ പ്രതിപക്ഷ നേതാവ് രമേശ് ചെന്നിത്തല അവതരിപ്പിച്ച സബ്മിഷന് മറുപടി നല്‍കുകയായിരുന്നു അദ്ദേഹം. സ്ഥാപിത താല്‍പ്പര്യക്കാര്‍ വിഷയം മുതലെടുക്കുന്നു.
ഏതെങ്കിലുമൊരു മതവിഭാഗത്തെ ഇതിന്റെ പേരില്‍ പ്രതിക്കൂട്ടില്‍ നിര്‍ത്താന്‍ സാധിക്കില്ല. വിഷയത്തില്‍ മുസ്ലീങ്ങളെ ആകെ പുകമറയില്‍ നിര്‍ത്താന്‍ ശ്രമിക്കുന്നു. മുതലെടുപ്പിനുള്ള ശ്രമങ്ങള്‍ അനുവദിക്കില്ലെന്നും മുഖ്യമന്ത്രി നിയമസഭയില്‍ പറഞ്ഞു.
തീവ്രവാദത്തോട് വിട്ടുവീഴ്ചയില്ലാത്ത നിലപാടാണ് സര്‍ക്കാരിന്റേത്. കാസര്‍കോട് നിന്ന് 17 പേരും പാലക്കാട് നിന്ന് നാല് പേരെയുമാണ് കാണാതായത്. ഇവരില്‍ ചിലര്‍ ഐഎസില്‍ ചേര്‍ന്നു എന്നാണ് വാര്‍ത്തകള്‍. ഇക്കാര്യത്തില്‍ കേന്ദ്ര ഏജന്‍സികള്‍ക്കൊപ്പം സഹകരിച്ച്‌ അന്വേഷണം നടത്തും. വിഷയം അതീവ ഗൗരവതരമെന്നും അദ്ദേഹം പറഞ്ഞു.
കാണാതായ മലയാളികളെല്ലാം ഐഎസില്‍ ചേര്‍ന്നുവെന്ന വാര്‍ത്ത വിശ്വസനീയമല്ലെന്ന ചെന്നിത്തല നിയമസഭയില്‍ പറഞ്ഞു. വിഷയം അതീവ ഗൗരവതരമെന്നും , ഭീകരവാദം ഏത് രീതിയിലുള്ളതാണെങ്കിലും എതിര്‍ക്കപ്പെടണമെന്നും നിയമസഭയില്‍ അദ്ദേഹം പറഞ്ഞു. അതേസമയം വോട്ട് ബാങ്ക് മാറ്റിവച്ച്‌ വിഷയം ചര്‍ച്ചചെയ്യണമെന്ന് ഒ. രാജഗോപാല്‍ പറഞ്ഞു.
