300 ഗ്രാം കഞ്ചാവുമായി അഞ്ചു യുവാക്കൾ അറസ്റ്റിൽ
വര്‍ക്കല: വിനോദസഞ്ചാര മേഖലകളില്‍ പ്രവര്‍ത്തിക്കുന്ന റിസോര്‍ട്ടുകളിലും ഹോംസ്റ്റേകളിലും കഞ്ചാവ് വില്‍പന നടത്തിവന്ന അഞ്ച് യുവാക്കളെ എക്സൈസ് സംഘം പിടികൂടി.
വര്‍ക്കല ഹെലിപ്പാഡിന് സമീപം പ്രവര്‍ത്തിക്കുന്ന ആഡംബര റിസോര്‍ട്ടില്‍ നിന്നാണ് 300 ഗ്രാം കഞ്ചാവും കഞ്ചാവ് തൂക്കാന്‍ ഉപയോഗിക്കുന്ന ത്രാസും സഹിതം അഞ്ച് യുവാക്കളെ അറസ്റ്റ് ചെയ്തത്.
നാവായിക്കുളം അയിരമണ്‍നില വടങ്കരമൂല കുന്നുവിള വീട്ടില്‍ സെയ്ദ് അലി (24), തിരുവനന്തപുരം കോളിയൂര്‍ മുട്ടക്കാട് വാഴത്തോട്ടം മേലേപുത്തന്‍വീട്ടില്‍ അജിത്ത് (22), മലയിന്‍കീഴ് പെരിങ്കാവ് പുതുവീട്ടില്‍മേല്‍ അഭിജിത്ത് ഭവനില്‍ അനിരുദ്ധ് (20), മലയിന്‍കീഴ് വിഴവൂര്‍ തെങ്ങുവിളാകം വീട്ടില്‍ ദീപു (20), നാവായിക്കുളം കുടവൂര്‍ കപ്പാംവിള ഞാറയില്‍കോണം പാറക്കെട്ടില്‍ വീട്ടില്‍ മുഹമ്മദ് റാഷിദ് (23) എന്നിവരാണ് അറസ്റ്റിലായത്.
റിസോര്‍ട്ടുകളില്‍ റൂമെടുത്ത് താമസിച്ച്‌ ആവശ്യക്കാരെ ഫോണ്‍ മുഖേന കണ്ടെത്തി കഞ്ചാവ് വില്‍പന നടത്തുകയാണ് സംഘത്തിൻ്റെ രീതി. വാട്സ്‌ആപ് പോലുള്ള സോഷ്യല്‍ മീഡിയ ആപ്പുകള്‍ വഴിയാണ് സംഘത്തിൻ്റെ പ്രവര്‍ത്തനം.
പ്രതികളില്‍നിന്ന് ലഭിച്ച വിവരത്തിെന്‍റ അടിസ്ഥാനത്തില്‍ നടത്തിയ പരിശോധനയില്‍ കെ.എല്‍ 23 ക്യൂ 7351 രജിസ്റ്റര്‍ നമ്ബരിലുള്ള ബുള്ളറ്റില്‍ വന്ന കരുനാഗപ്പള്ളി ആലപ്പാട് വില്ലേജില്‍ പണ്ടാരത്തുരുത്ത് കണ്ടത്തില്‍ വീട്ടില്‍ മുത്തപ്പന്‍ എന്ന ആദിത്യകുമാറിനെ (23) 100 ഗ്രാം കഞ്ചാവുമായി അറസ്റ്റ് ചെയ്ത് കേസെടുത്തു.
എക്സൈസ് വര്‍ക്കല റേഞ്ച് ഇന്‍സ്പെക്ടര്‍ മഹേഷ്, പ്രീവന്‍റിവ് ഓഫിസര്‍ രാധാകൃഷ്ണന്‍, സിവില്‍ എക്സൈസ് ഓഫിസര്‍മാരായ പ്രിന്‍സ്, മഹേഷ്, ഷിജു, രാകേഷ്, ഡ്രൈവര്‍ ഗിരീശന്‍ എന്നിവരുടെ നേതൃത്വത്തിലാണ് മിന്നല്‍ റെയ്ഡ് നടന്നത്.
