വയോധികനെ കുത്തിക്കൊല്ലാന് ശ്രമം; ബന്ധുവടക്കം മൂന്നുപേര് അറസ്റ്റിൽ
തൃശൂര്: ഒല്ലൂരില് നടുറോഡില് വയോധികനെ കുത്തിക്കൊലപ്പെടുത്താന് ശ്രമം. സംഭവത്തില് ബന്ധു ഉള്പ്പെടെ മൂന്നുപേരെ പോലീസ് കസ്റ്റഡിയിലെടുത്തു.
ഒല്ലൂര് ക്രിസ്റ്റഫര് നഗര് സ്വദേശി വെളപ്പാടി വീട്ടില് ശശിയെ (60) ആണ് കൊലപ്പെടുത്താന് ശ്രമമുണ്ടായത്. ഇയാളെ ആശുപത്രിയില് പ്രവേശിപ്പിച്ചു. ശശിയുടെ അടുത്ത ബന്ധുവുള്പ്പെടെയുള്ളവരാണ് പിടിയിലായത്.
രാവിലെ നടക്കാനിറങ്ങിയ വയോധികനെ ക്രിസ്റ്റഫര് നഗറിലുള്ള വൈലോപ്പിള്ളി സ്കൂളിനു മുന്നില് വച്ച് സഹോദരന്റെ മകന് അക്ഷയ്കുമാറും രണ്ടു സുഹൃത്തുക്കളും ചേര്ന്ന് കത്തികൊണ്ട് കുത്തി പരിക്കേല്പ്പിക്കുകയായിരുന്നു. കഴുത്തിനു താഴെ പുറത്തും തോളിലും കുത്തേറ്റിട്ടുണ്ട്. പുറത്തേറ്റ കുത്ത് ആഴത്തിലുള്ളതാണ്. പരിക്കേറ്റ ശശി ജനറല് ആശുപത്രിയില് ചികിത്സയിലാണ്.
ബന്ധുക്കളായ ശശിയും അക്ഷയ്കുമാറും തമ്മില് നായ വളര്ത്തലുമായി ബന്ധപ്പെട്ട തര്ക്കമാണ് കത്തിക്കുത്തില് കലാശിച്ചതെന്ന് പറയുന്നു.