ജോസ് കെ മാണി വിഭാഗത്തെ യു.ഡി.എഫില് നിന്ന് പുറത്താക്കി
തിരുവനന്തപുരം: തര്ക്കങ്ങള്ക്കൊടുവില് കേരള കോണ്ഗ്രസ്-ജോസ് പക്ഷത്തെ യുഡിഎഫില് നിന്നും പുറത്താക്കി. ഇന്ന് ചേര്ന്ന മുന്നണിയോഗമാണ് അപ്രതീക്ഷിത തീരുമാനം കൈക്കൊണ്ടത്. ജോസ് കെ. മാണി പക്ഷത്തെ പുറത്താക്കിയെന്ന കാര്യം യുഡിഎഫ് കണ്വീനര് ബെന്നി ബെഹനാന് സ്ഥിരീകരിച്ചു.
കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനത്തെച്ചൊല്ലി ജോസ്-ജോസഫ് വിഭാഗങ്ങള് തമ്മിലുള്ള തര്ക്കത്തിനൊടുവിലാണ് ഒരു വിഭാഗത്തെ മുന്നണിയില് നിന്നും പുറത്താക്കിയത്. പ്രസിഡന്റ് സ്ഥാനം ജോസഫ് ഗ്രൂപ്പിന് വിട്ടുനല്കണമെന്ന ധാരണ പാലിക്കാന് ജോസ് വിഭാഗം തയാറായിരുന്നില്ല. ഇതിന്റെ പേരില് ഇരുവിഭാഗങ്ങളും വലിയ തര്ക്കത്തിലേര്പ്പട്ടതോടെ യുഡിഎഫ് ഇടപെട്ടിരുന്നു.
ചര്ച്ചകള് നടത്തിയിട്ടും വേണ്ടത്ര സമയം നല്കിയിട്ടും യുഡിഎഫിന്റെ ധാരണ നടപ്പാക്കുന്നതില് ജോസ് വിഭാഗം സഹകരിച്ചില്ലെന്നും അതിനാല് അവര്ക്ക് യുഡിഎഫില് തുടരാന് അര്ഹതയില്ലെന്നും കണ്വീനര് അറിയിച്ചു. ഇതില് ലാഭ-നഷ്ട കണക്കുകള് നോക്കുന്നില്ലെന്നും ഇനി ചര്ച്ചയുടെ ആവശ്യമില്ലെന്നും ബെന്നി കൂട്ടിച്ചേര്ത്തു.
മുന്നണി നേതൃത്വം ഇടപെട്ടിട്ടും മുന്ധാരണ പ്രകാരം പ്രസിഡന്റ് സ്ഥാനം ജോസഫ് വിഭാഗത്തിന് നല്കാന് ജോസ് പക്ഷം തയാറായിരുന്നില്ല. ഉമ്മന് ചാണ്ടി, രമേശ് ചെന്നിത്തല, മുല്ലപ്പള്ളി രാമചന്ദ്രന്, പി.കെ.കുഞ്ഞാലിക്കുട്ടി തുടങ്ങിയ നേതാക്കള് ഇടപെട്ടെങ്കിലും രാജിയില്ലെന്ന തീരുമാനത്തില് ജോസ് കെ. മാണി ഉറച്ചുനില്ക്കുകയായിരുന്നു.
വിഷയത്തില് ഇന്ന് തീരുമാനമുണ്ടാകുമെന്നാണ് യുഡിഎഫ് നേതൃത്വം വ്യക്തമാക്കിയിരുന്നത്. ഇന്ന് മുന്നണി യോഗം ചേരുന്നതിനിടയില് ജോസ് കെ. മാണിയെ ബന്ധപ്പെട്ടെങ്കിലും തീരുമാനം മാറ്റില്ലെന്ന് അദ്ദേഹം നിലപാടെടുക്കുകയായിരുന്നു. തുടര്ന്നാണ് കടുത്ത നിലപാടിലേക്ക് മുന്നണി നേതൃത്വം നീങ്ങിയത്.