കോയമ്പത്തൂര് അപകടം: അടിയന്തര നടപടി സ്വീകരിക്കാൻ മുഖ്യമന്ത്രി കലക്ടര്ക്ക് നിര്ദേശം നല്കി
തിരുവനന്തപുരം: കോയമ്പത്തൂരില് ഉണ്ടായ വാഹനാപകടത്തില് പരിക്കേറ്റവര്ക്ക് അടിയന്തര വൈദ്യസഹായം നല്കാനും മരണമടഞ്ഞവരുടെ മൃതദേഹങ്ങള് എത്രയും വേഗം നാട്ടില് എത്തിക്കാനും വേണ്ട സൗകര്യങ്ങള് ചെയ്യാന് പാലക്കാട് ജില്ലാ കലക്ടര്ക്ക് മുഖ്യമന്ത്രി പിണറായി വിജയന് നിര്ദേശം നല്കി.
ബാംഗ്ലൂരില് നിന്ന് എറണാകുളത്തേക്ക് വരികയായിരുന്ന ബസ് ആണ് അപകടത്തില്പ്പെട്ടത്. മരണമടഞ്ഞവരെ തിരിച്ചറിയാനുള്ള നടപടികള് പുരോഗമിക്കുകയാണ്. തമിഴ്നാട് സര്ക്കാരുമായും തിരുപ്പൂര് ജില്ലാ കലക്ടറുമായും സഹകരിച്ച് സാധ്യമായ എല്ലാ ആശ്വാസ നടപടികളും കൈക്കൊള്ളും. അപകടത്തില് മരണമടഞ്ഞവരുടെ കുടുംബങ്ങളെ അനുശോചനം അറിയിക്കുന്നതായി മുഖ്യമന്ത്രി പറഞ്ഞു. അപകടത്തെക്കുറിച്ച് വിശദമായി അന്വേഷിച്ച് റിപ്പോര്ട്ട് നല്കാന് കെഎസ്ആര്ടിസി എംഡിയോട് ഗതാഗതമന്ത്രി എ കെ ശശീന്ദ്രന് നിര്ദേശിച്ചു.