കാഷായ വസ്ത്രം ധരിച്ച് ആളുകളെ വെടിവച്ചു കൊല്ലുന്ന കള്ള സന്യാസിമാരാണ് യോഗിയും സംഘവും: കെ. മുരളീധരന്
കോഴിക്കോട്: കാഷായവസ്ത്രം ധരിച്ച് ആളുകളെ വെടിവച്ചു കൊല്ലുന്ന കള്ള സന്യാസിമാരാണ് ഉത്തര്പ്രദേശ് മുഖ്യമന്ത്രി യോഗി ആദിത്യനാഥും സംഘവുമെന്നു കോണ്ഗ്രസ് എം.പി കെ. മുരളീധരന്. കോഴിക്കോട്ട് മുസ്ലിം ലീഗ് സംഘടിപ്പിച്ച പരിപാടിയില് സംസാരിക്കുകയായിരുന്നു അദ്ദേഹം.
ലൗകീക സുഖങ്ങള് വെടിഞ്ഞവനായിരിക്കണം ഒരു സന്യാസി എന്നാണു ഹിന്ദു മതത്തില് പറയുന്നത്. കാഷായവസ്ത്രവും രുദ്രാക്ഷവും ധരിച്ചാല് പിന്നെ വേറെ പണിക്കൊന്നും പോകരുത്. പക്ഷേ, യോഗി കാണിക്കുന്നത് എന്താണ്?, കാഷായ വസ്ത്രം ധരിച്ചു തെരഞ്ഞെടുപ്പില് മത്സരിക്കുക, ജയിക്കുക, കൊടിവച്ച കാറില് കയറുക, ആളുകളെ വെടിവച്ചു കൊല്ലുക. പത്തുനല്പതു പേരെയാണ് ഉത്തര്പ്രദേശില് വെടിവച്ചു കൊന്നതെന്നും മുരളീധരന് ചൂണ്ടിക്കാട്ടി.
മുസ്ലിംകള് അതിഥികളാണെന്നാണു കഴിഞ്ഞ ദിവസം ഒരു ആര്എസ്എസുകാരന് പറഞ്ഞത്. ഇതു പറയാന് അവരുടെ തറവാട്ടു സ്വത്താണോ ഇന്ത്യയെന്നും മുരളി ചോദിച്ചു. ഹിന്ദു പുരാണത്തില് ആദ്യത്ത കള്ള സന്യാസിയായതു രാവണനാണെങ്കില് ആ രാവണന്റെ പിന്ഗാമികളായ കള്ള സന്യാസിമാരാണ് ഇന്ന് ആര്എസ്എസിനെ നയിക്കുന്നതെന്നും കോണ്ഗ്രസ് എംപി പരിഹസിച്ചു.