ഹാഗിബിസ് ചുഴലിക്കാറ്റിലും വെളളപ്പൊക്കത്തിലും മരിച്ചവരുടെ എണ്ണം 35 ആയി
ടോക്കിയോ: ജപ്പാനില് കനത്ത നാശം വിതച്ച് ആഞ്ഞടിച്ച ഹാഗിബിസ് ചുഴലിക്കാറ്റിലും വെളളപ്പൊക്കത്തിലും മരിച്ചവരുടെ എണ്ണം 35 ആയി. കാണാതായ 17 പേര്ക്കായി തെരച്ചില് തുടരുകയാണ്. ചുഴലിക്കാറ്റു മൂലമുണ്ടായ ശക്തമായ കാറ്റിലും മഴയിലും പുഴകള് കരകവിയുകയാണ്. നൂറിലധികം പേര്ക്ക് പരുക്കേറ്റെന്നാണ് റിപ്പോര്ട്ട്.
കനത്ത വെള്ളപ്പൊക്കവും മണ്ണിടിച്ചിലും കാരണം വിവിധ ഇടങ്ങളില് കുടുങ്ങിക്കിടക്കുന്നവര്ക്കുള്ള രക്ഷാപ്രവര്ത്തനം തുടരുകയാണ്. ചിലയിടങ്ങളില് ഉരുള്പ്പൊട്ടലും റിപ്പോര്ട്ട് ചെയ്തിട്ടുണ്ട്. ദുരിതബാധിത മേഖലയില് നിന്ന് നിരവധിപേരെ മാറ്റിപ്പാര്പ്പിച്ചു. വെള്ളപ്പൊക്കം കാരണം റഗ്ബി ലോകകപ്പിലെ നിരവധി മത്സരങ്ങള് റദ്ദാക്കി. ശനിയാഴ്ച രാത്രി ഏഴ് മണിയോടെയാണ് ജപ്പാനിലെ പ്രധാന ദ്വീപായ ഹോന്ഷൂവില് ഹാഗിബിസ് ചുഴലിക്കാറ്റ് ആഞ്ഞടിച്ചത്. മണിക്കൂറില് 225 കിലോ മീറ്ററിര് വേഗതയിലാണ് കാറ്റ് വീശിയത്. 60 വര്ഷത്തിനിടെ ജപ്പാനിലുണ്ടാകുന്ന ഏറ്റവും ശക്തമായ ചുഴലിക്കാറ്റാണ് ഹാഗിബിസ്. 31,000 സെനികരാണ് രക്ഷാപ്രവര്ത്തനത്തിനായി രംഗത്തുള്ളത്.
വീടുകള്ക്കുള്ളിലും മേല്ക്കൂരകളിലും മറ്റുമായി കുടുങ്ങി കിടക്കുന്നവരെ ഹെലികോപ്റ്ററിന്റെയും ബോട്ടുകളുടെയും സഹായത്തോടെ രക്ഷിക്കാനുള്ള ശ്രമം തുടരുകയാണ്. ശക്തമായ വെള്ളപ്പൊക്കത്തില് മിക്ക പ്രദേശങ്ങളും ഒറ്റപ്പെട്ട അവസ്ഥയിലാണ്. വിവിധ അഭയകേന്ദ്രങ്ങളിലായി ആയിരക്കണക്കിന് ആളുകളാണ് കഴിയുന്നത്.