കൂടത്തായി കേസ്: പ്രതികളുടെ കസ്റ്റഡി അപേക്ഷ നാളെ പരിഗണിക്കും
കോഴിക്കോട്: കൂടത്തായി കൊലപാതകപരമ്പരയിലെ മുഖ്യപ്രതി ജോളി ഉള്പ്പെടെയുള്ളവരെ ഹാജരാക്കാന് താമരശ്ശേരി ജുഡിഷ്യല് മജിസ്ട്രേറ്റ് കോടതിയുടെ നിര്ദ്ദേശം. ഒന്നാം പ്രതി ജോളി, മാത്യു, പ്രജുകുമാര് എന്നിവരെ നാളെ രാവിലെ 10 മണിക്ക് ഹാജരാക്കാനാണ് കോടതി നിര്ദ്ദേശിച്ചിരിക്കുന്നത്. ഇതുമായി ബന്ധപ്പെട്ടുള്ള പ്രൊഡക്ഷന് വാറണ്ടും ജുഡീഷ്യല് മജിസ്ട്രേറ്റ് കോടതി പുറപ്പെടുവിച്ചു.
പ്രതികളെ കൂടുതല് ചോദ്യം ചെയ്യുന്നതിനായി കസ്റ്റഡിയില് വിട്ടു നല്കണമെന്ന് ആവശ്യപ്പെട്ട് ക്രൈംബ്രാഞ്ച് അപേക്ഷ നല്കിയിട്ടുണ്ട്. തെളിവുകള് ശേഖരിക്കുന്നതിനും മറ്റുമായി 15 ദിവസത്തേക്ക് കസ്റ്റഡിയില് ലഭിക്കാനാണ് അപേക്ഷ നല്കിയിരിക്കുന്നത്. കൊലപാതകങ്ങള്ക്ക് പിന്നില് വന് ആസൂത്രണം നടന്നിട്ടുണ്ട്. കൊലപാതകങ്ങളുടെ ചുരുളഴിക്കാന് വിശദമായഅന്വേഷണം വേണം. കേസിെന്റ വേരുകള് കട്ടപ്പനയിലും ഉണ്ടെന്നും ജോളിയെ കട്ടപ്പനയിലെത്തിച്ച് തെളിവെടുപ്പ് നടത്തേണ്ടതുണ്ടെന്നും പൊലീസ് കസ്റ്റഡി അപേക്ഷയില് വ്യക്തമാക്കി. കസ്റ്റഡി അപേക്ഷ നാളെ പരിഗണിക്കും.
റിമാന്റിലുള്ള പ്രതി മാത്യുവിന്റെ ജാമ്യാപേക്ഷയും നാളെ പരിഗണിക്കും. രണ്ടാം പ്രതിയായ മാത്യുവിനു വേണ്ടി ഇന്ന് അഭിഭാഷകര് കോടതിയില് ഹാജരായിരുന്നു. മാത്യുവിന്റെ ജാമ്യാപേക്ഷ നാളെ പരിഗണിക്കാമെന്നാണ് കോടതി അറിയിച്ചത്. മറ്റ് പ്രതികളായ ജോളിക്കോ പ്രജുകുമാറിനോ വേണ്ടി ഇതുവരെ അഭിഭാഷകര് കോടതിയില് എത്തിയിട്ടില്ല.